Z Dešna/Dissen. Zapustaŕki a zapustarje w Dešnje su byli 1980 te prědne w cełej Dolnej Łužycy, ako su wugótowali zapustojski jubilej – ga ten 100. A to jo měło teke swóju historisku pšawosć: Wokoło lěta 1870 ga běšo tegdejšy chóśebuski landrot pśikazał, až smějo se zapust jano hyšći tśi dny swěśiś, a nic ceły tyźeń. A tak jo to źinsa hyšći – camprowanje, młoźinski zapust a muskecy zapust. To groni: Tśi dny, tśi raze.

A dokulaž w Dešnje kuždu góźbu – teke tu nejmjeńšu – wužywaju, aby we wjelikej abo mjeńšej runźe swěśili, su, to se wě, teke ten 140. zapust wupytali za taki wjeliki ruš. Pilnje a dłujko su se na to pśigótowali – naprědku Domowinska kupka a młoźina.