Z Gór/Guhrow. Su swěśili swój 143. zapust na Górach – a pasujucy k tej licbje jo se jim raźiło, až jo było 43 zapustojskich pórow.

Młoźina a starše su se wobźělili, teke styri źiśece. To jo južo někotare lěta na Górach tak, až njamaju młoźinski a muskecy zapust separatnje, ale až wšykne zgromaźe swěśe. Južo dłujki cas how njamaju wěcej młoźinsku domowinsku kupku, dokulaž jadnorje ten dorost felujo. Ale domowinska kupka how wobstoj, kótaraž se pilnje za to serbske nałogstwo we jsy stara. Cłonk w pśedsedaŕstwje teje domowinskeje kupki, ako jo za zapust zagronity – a to južo pór lět –, jo 29lětna Lysann Rybakojc. Wót swójogo 14. lěta se na górjańskem zapusće wobźělijo a jo hyšći dožywiła, až młoźinska kupka jo how statkowała. Ale až ta wěcej njejo, wóna za tak tragiski njama. „Ja tak a tak se myslim, až młode a starše wjelgin derje zgromaźe swěśiś mógu. My smy wjelgin luštna, pisana šwita!“, wóna groni.