Z Turnowa/Turnow. Pśiducu njeźelu budu tudy swěśiś wjeliki 150. zapust. A gaž te 120 pórow a 20 źiśecych pórikow se zestupaju pśi kjarcmje „Goldener Krug“ do dłujkeje smugi, ga wjele jich a gósći budu pśistym póglědaś na nowe tofle. Te same ga budu stajone, njebuźo-li se padaś, wence, kradu we bližy togo městka, źož ten wjasoły pśeśěg buźo se zachopiś. A na nich su pokazane pjerwjejšne zapusty w Turnowje!

Wobydlarje deje se źěkowaś za tu iniciatiwu jadnomu we jsy wjelgin znatemu cłowjekoju, kótaremuž gronje Fryco Šwjela. Wón jo 72 lět stary, pjerwjej jo był wjednik gercow wognjoweje wobory. Wón jo se južo dawno do głowy sajźił, až buźo historiju zapusta we jsy znatu cyniś. „Naš wjeliki 150. zapust, ak swěśimy lětosa, jo za mójim zdaśim ta pšawa góźba, aby se dopomnjeli, kak my a naše starjejše we młodych lětach smy tu tradiciju swěśili – rozkładujo nam Fryco Šwjela.