Z Města/Cottbus: Lětosa buźo kradu 30 lět, až mamy w Chóśebuzu Serbski dom ako centrum serbskego a Domowinskego žywjenja w Dolnej Łužycy. Domowinska kupka w měsće, ako słuša z 80 cłonkami k tym nejwětšym w župje Dolna Łužyca, co ten jubilej wóswěśiś. A to by se mógało staś z wjelgin pisanym serbskim swěźenjom na dwórje Serbskego domu, a to pó móžnosći w drugej połojcy awgusta.
Rowno wó tom jo było to grono gano na głownej zgromaźinje teje kupki 20. februara w Serbskem domje. Pśibytne su to witali a pśišli su južo prědne ideje za program togo swěźenja. Wustupiś by mógali małe kupki a jadnotliwce z krotkimi pśinoskami – ze spiwami, z muziku a snaź teke z krotkim kabaretom. Waltraud Štoltowa, ako južo wjele lět źěła na Dolnoserbskem gymnaziumje ako ceptaŕka za muziku a dirigentka chora, jo pśigroniła, až co dobyś wuknice a wuknikow teje šule, aby sobu wugótowali program. Wažne pak něnto jo, až wše te, ako „sejźe“ w Serbskem domje, tu ideju pódpěraju a pomagaju swěźeń sobu pśigótowaś.