Amt pomina wót nich płaśonk za wužywanje śpy

Do grona jo na zgromaźinje pśišło teke to: Kupka jo kśěła oficielnje wuswěśiś w měrcu tu wótnowjonu śpu we gmejnskem centrumje, źož pśedsedaŕstwo jo dotychměst wobradowało. K tomu pak njejo pśišło: Picański amt jo jim pósłał pismo, źož su jim zjawili, až deje wótněnta za wužywanje teje śpy płaśonk płaśiś. Pśeto amt jo wjele pjenjez do togo wótnowjenja zatkał. Kóńcak jo kritizěrował, až rowno Domowinska kupka jo ta prědna, ak jo take pismo dostała, a za jogo zdaśim njemaka se taki płaśonk z tym do wustawy zapisanym pšawom Serbow na pódpěru a spěchowanje.

Śicha minuta k cesći Waltera Blinda

Wšykne su ze śicheju minutu wucesćili Waltera Blinda, cłonka kupki, ak jo we 93. lěśe swójogo žywjenja na prědnem dnju nowego lěta wumrěł a rowno na dnju zgromaźiny na turjańskem kjarchobje zakopany wordował. Kóńcak jo na zakopowanju we mjenju kupki jogo statki k lěpšemu serbskeje rěcy a kultury pśi rowje zespominał a cesćił.

Nic larbaty bal, ale serbska kjarmuša