Nic jano muske se pśigótuju pilnje na EUROPEADU, teke źowća a žeńske to gótuju. Tśi dny dłujko - wót 31. januara do 2. februara - su toś póbyli balokopaŕki z Dolneje a Górneje Łužyce w Bedrichowje w Českich górach. 16 jo jich było, a wóni su z trenarjom Pětřom Bejmakom pilnje treněrowali a grali. Jaden źeń su byli ze sněgakami ducy. 
Z Dešna/Dissen. Za pśigótowanje EUROPEADY 2020 – to groni europske mejstaŕstwa narodnych mjeńšynow w balokopanju – jo se łoni załožył wósebny wuběrk „Serbske mustwo – Europeada 2020“. W njom źěła dogromady źaseś luźi sobu –pěśo z Dolneje Ĺužyce a pěśo z Górneje Łužyce. To su za wětšy źěl trenarje a balokoparje. Toś ten gremium nawjedujo Clemens Škóda, referent Domowiny za kulturu a mjazynarodne źěło, a ten buźo teke nawjedowaś delegaciju z balokoparjami a balokopaŕkami, z trenerjami a dalšnymi „pomocnikami“ – dogromady z něźi 60 wósobinami. Domowina ga jo cłonk Federalistiskeje unije europskich narodnosćow (FUEN), a wóna pósćelo na EUROPEADU wót 20. junija až do 28. junija togo lěta w Kórytańskej (Kärnten) w Awstriskej dwě mustwje – jadno žeńskece a jadno muskece. Docełego prědny raz grajotej we wobyma mustwoma zastupniki z Dolneje a Górneje Łužyce.
Slědny tyźeń wałtoru jo se pśigótowański wuběrk w Dešnje zmakał k swójomu tśeśemu pósejźenju. Mjazy cłonkami a gósćimi jo se teke wobźělił Dawid Statnik, pśedsedaŕ Domowiny.
