Tšojło jo se to w septemberje lěta 2017 w Radušu. Tam su swěśili bramborski wejsny a žnjowny swěźeń. Mjazy tymi, ako su se tym wjele towzynt woglědarjam a gósćam na wšaki part pśedstajili, stej byłej teke Radochlic manźelskej Rolf a Edeltraud z Rubyna. Wón běšo ze swójimi wobrazami do Raduša pśijěł, a wóna jo pokazowała swóje „wušywane wobraze“. A pśi tej góźbje su se wónej a Milena Stockowa z Chóśebuskeje Lodki na tu wujadnali, až buźo Rolf Radochla raz swój mólaŕski kumšt pokazaś w Serbskem domje w Chóśebuzu...
Něnt, pśisamem dwě lěśe pózdźej, jo se to zwónoźiło, do statka stajiło. 30. januara su w Lodce wótwórili jogo personalnu wustajeńcu z motom „prěcne smužki — Querstriche“.
Jogo prědna personalna wustajeńca jo była wiźeś łoni w Žandojskej bibliotece w měsće, a wót lěta 2013 jo se Rolf Radochla we dogromady źewjeś wustajeńcach ze swójimi mólbami wobźělił – mjazy drugim w něgajšnem dwórnišću w Tšupcu, we wejsnem domje w Gołbinje, w cerkwi w Nowej Niwje a we Wokrejsnem domje w Baršću.