Chtož jo pśišeł pětk, 28. januara, do Dešna, togo jo tam wótcakowała pśisamem prozna wjas. Bejny źěł wobydlari ga jo se ten źeń južo zajtša wudał na drogu do Barlinja. Ze tśimi busami jo se wokoło 150 luźi wupórało do głownego města, za wětšy źěł Dešanaŕki a Dešanarje a z nimi gromaźe žedne gósći ze susednego Strjažowa a z města.

Su to byli źiśi, młodostne a starše, mjazy nimi wokoło 25 źowćow a žeńskich we serbskej drastwje, teke z lapu, a tej nejmłodšej wót nich stej byłej Elisabeth Hähnischojc a Eva Burgmeierojc. We tych tśich busach su sejźeli cłonki wšych towaristwow a kupkow, wót Domowinskeje kupki, wejsnego muzeja a jogo towaristwa, wognjoweje wobory, sportowego zjadnośeństwa, towaristwa za šćit pśirody a dešańskeje wósady. Teke cłonki stśělcowego towaristwa su byli pódla a serbski pcołkaŕ Reinhard Šołtka z Drjejc, ako ma w Dešnje swóju pcołkaŕnju. A ceło naprědku, to se wě, Fred Kaiser ako šołta a dalšne cłonki gmejnskeje rady.