Z Dešna/Dissen. Pó woklapnicy w Strjažowje jo pětk pśedslědny tyźeń wěcej ako 120 wobydlari se zgromaźiło na woklapnicy w Serbskem dwórje. Šołta Fred Kaiser a zastupniki towaristwow su wulicowali wót raźonych tšojenjow łoni.

To se wě, až ceło prědku pśi tom slědk-glědanju jo stojało to cełonimske wuběźowanje „Naša wjas ma pśichod“. Dešno jo wordowało we njom ako jadna wót wósym jsow we cełej Nimskej pócesćone ze złośaneju medalju. Kaiser jo wobydlarjam pśiwołał: „My wšykne smy dobywarje!“ A wón jo gronił, až serbski charakter Dešna a jogo serbske wósebnosći su kradu k tomu raźenju pśipomogli. „Naša serbska historija a jeje prezenca we jsy we źinsajšnem casu – nad tym jo se jury wjelgin późiwała“. Te 15.000 euro myta, ak jo se jim dostało, co gmejnska rada wudaś za nowe grajnišćo za źiśi w Dešnje a k sajźenju sadowych bomkow w Strjažowje. Kaiser jo pśipowěźeł, až na Zelenem tyźenju w Barlinju krydnu wóni to myto oficielnje pśepowdane (to jo se tuchylu stało ­– lazujśo na 1. boce).