Z Groźišća/Grötsch. Mósćańska gmejna musy góspodarjowaś kradu za konceptom k wurownanju etata. Za Groźišćo jo było we gmejnskem etaśe łoni jadnab 5.300 euro wustajonych, ak prědkstojaŕ jo mógał za swójim wuznaśim wudaś. K tym wudankam su słušali mjazy drugim internetowy router we gmejnskem zalu (něnto móžoš tam ako gósć mimo kabla ze smartfonom abo laptopom do interneta pśiś), nowe kricki, pórěźenje delow pśi grajnišću, nowy kokotk a murjaŕske źěło na kjarchobje. Kaž južo we zachadnych lětach, jo Wjencko jano za material pjenjeze wudał, to źěło jo wón gótował za wětšy źěł sam abo z pomocnikami. Wjele akcijow su pśewjadli sami: pódrubanje stareje wjerby, nalětne a nazymske rěšenje, cysćenje grajnišća, wejsny swěźeń atd. Nejwěcej kuriozna škóda jo nastała we płośe pśi gmejnskej wjažy: tudy su sarnje za wšym zdaśim se pśeźěsyli a kśěli z mócu se pśez płot pśederiś. To njejsu wóni pśemógli, ale ten płot jo weto wobškóźony.

Chrom wognjoweje wobory ma nowe cerwjene wrota, to jo była ta wětša inwesticija we jsy (5.200 €), za kótaruž jo Picański amt pjenjeze dał.