Z cym jo gmejnska rada była łoni zabrana? To wětše pólěpšenje ma cyniś z internetom. Něnto maju we jsy wšuźi spěšny internet. To pśizamknjenje jo we slědnyma dwěma lětoma wuwjadł koncern telecom, wóni su ten nadawk za błośańske a picańske strony dobyli. Chtož we bliskosći rozdźělowaka (Verteiler) bydli, ten móžo spěšnosć datow wót 100 megabitow na sekundu dostaś, druge maju 50 megabitow na sekundu. Z tym jo ta internetowa źěra w Turjeju zapłatana – wót togo njeprofitěruju jano młode wobydlarje, ale teke campingowanišćo w Maznikach.
K raźonym pśedewześam słuša wótnowjenje pśewoblekaŕnje pśi sportnišću. Tam maju něnto topjenje a śopłu wódu k piśeju.
Někotare drogi su pórěźone: kólasowa droga a droga za pěškarje we jsy, drožki pśi gmejnskej wjažy su ze šplitom pówózone.
W źiśowni su dymnicu z titanowym cinkom wobbili a grajny torm wutwarili. W Maznikach pśi campigowanišću su nowe wrota stajili, w Šejnejźe bomki pśirězali, a w Turjeju sadowe bomy nasajźali. Na kjarchobje pórěźaju se hyšći kokotk a rory za wódu.
Zeschnute bomy na Dańskich Łukach