Z Turjeja/Tauer. Gmejnska rada wobora se tudy kradu pśeśiwo zjadnosćenju gmejnow Picańskego amta we jadnej wjelikogmejnje. To jo šołtowka Karin Kalawcyna pódšmarnuła na woklapnicy pětk wjacor we Christinenhofje pśed wěcej ako 60 wobydlarjami.

Ta wót bramborskego kněžaŕstwa planowana reforma zastojnstwowych strukturow w Bramborskej jo wordowała 2017 derje zastajona. Ta pótrjebnosć, až amtske a zastojnske kosty deje byś niske, wobstoj pak dalej. A dla togo pśemysluju někotare politikarje a zastojniki w Picańskem amśe, až mógali te něntejšne gmejny we picańskich stronach gromadu spóraś a jadnu wjeliku gmejnu załožyś.

To pak se šołtowce njespódoba, a wóna jo na woklapnicy te plany wótśe zatamała. Pśeto Turjej słuša k tym gmejnam, ako maju južo dłujki cas wurownany etat, a tudy źarže wjele na disciplinu pśi wudawanju pjenjez. Druge gmejny pak su se zacrěli do długa. „My njejsmy zwólne, jich dług pśewześ“, jo šołtowka groniła. Mjeńše gmejny su za jeje zdaśim tako wobydlarjam pśijaznjejše.

*