Z Chóśebuza/Cottbus. Nowa wjelika šula w gołkojskej gmejnje ‒ jadna cełkowna, źož mógu źowća a gólcy teke abituru gótowaś ‒ jo „na papjerje“, pśisamem gótowa. Pjenjeze za to su, z kreditom wót něźi 30 milionow euro. A něnto jo pśewzeł běrow architektow z Barlinja ten nadawk, se wumysliś, kak dej ta nowa šula blisko Gogolowka (Klein Gaglow) raz wuglědaś. Wušej 50 architektow jo se wó to procowało, samo z Italskeje a Portugalskeje.

Jasne jo, až šula změjo jano jadnu abo snaź dwě etažy, ale kaki buźo ten wjeliki chrom, na to su wšykne južo narske. Dłujko wěcej na to cakaś njemusymy, pśeto južo w šulskem lěśe 2022/23 deje se tam prědne wuknice a wukniki w 7. rědowni wucyś.