Lěc cośo studěrowaś abo we zastojnstwje źěłaś: wótergi su znaśa dolnoserbskeje rěcy pšašane. Wěcej hyšći, gaž cośo w jadnej serbskej instituciji źěłaś abo ako ceptarka a wótkubłarka. Abo Wy sćo pilny wuknik našeje rěcy, a cośo carno na běłem napisane měś, až sćo južo wjele wuknuli? Pón jo ten nowy rěcny certifikat za Was rowno to pšawe.
„Což my smy wuźěłali, to jo pśisamem pioněrske źěło“, jo groniła dr. Madlena Norbergowa 25. februara. Wóna jo prezentěrowała zjawnosći ten dolnoserbski rěcny certifikat. Styri lěta su Rěcny centrum Witaj (RCW) a jogo partnarje na njom źěłali. Južo 10 lět jo se diskutěrowało, až take něco notne jo.