Ze Strobic/Ströbitz. Rawnikojc maju swóju gjartnarnja za toflu do města (Ortseingangsschild), do směra Gołkojc, ale wóna słuša hyšći do města. Mějaŕ jo wót lěta 2014 Andreas Rawnik, ako jo pśewzeł wšykno wót nana Adolfa Rawnika. Ten jo póchadał ze Strjažowa a jo se wudał do Łakomeje. Tam jo familija žywa była, Andreas Rawnik jo tam wótrosł. Wšykne jogo stare starjejše su powědali serbske, nan cyta a rozmějo serbsku rěc. Andreas móžo hyšći někak cytaś to serbske. Brunicoweje jamy dla njejo familija mógała wóstaś we Łakomej. „Smy wěźeli, až dejmy wen. Toś jo mój nan pytał perspektiwy zwenka swójeje jsy a jo se kupił gjartnaŕnju w Strobicach, ako jo wobstojała z lěta 1953. Wótwórili smy gjartnaŕnju w aprylu 1984. Na zachopjeńku smy kuždy źeń jězdźili, w lěśe 1991 smy how śěgnuli. Smy pówětšyli rostlinaŕnju a wšake modernizěrowali. Pšawu lodu mamy wót 1993. Na BUGA 1995 smy sobu statkowali a na kuždej LAGA (Krajna zagrodowa wustajeńca), wót lěta 1997. Pśedawamy rostliny za grědy a balkon, krě a bomkaŕnjowe rostliny, a struse a kwětki za kuždu góźbu. My kupujomy wšykno ako młode rostlinki a pón je kublomy.