Z města Halle. Wědomnostne spěchowańske myto (wissenschaftlicher Förderpreis) pósłańca Pólskeje republiki w Nimskej ­– tak se groni mytoju, kótarež jo wustawjone wót pósłaństwa (Botschaft) Pólskeje republiki w Nimskej a Centruma za historiske slěźenje w Barlinju (to jo wótźělenje Pólskeje akademije wědomnosćow). Z nim se cesće disertacije a masterowe źěła na pólu duchnych a socialnych wědomnosćow w Nimskej, ako maju cyniś z pólskeju kulturu a historiju abo pólsko-nimskeju mjazsobnosću.

Pśi góźbje pósćenja togo myta jo mjazynarodna jury wu­znamjeniła teke masterske źěło Jill-Francis Ketlicojc z města, kótaraž jo našym lazowarjam znata ako nowa redaktorka Casnika a basnikaŕka Źilka. Na ten part su cesćili jeje masterske źěło z dłujkim titelom „Schauerromantik der Gegenwart im Schatten der Vergangenheit. Elfriede Jelineks Die Kinder der Toten und Joanna Bators Ciemno, prawie noc im Vergleich“. Awtorka jo jo napisała we fachu komparatistika ako kóńcne źěło studiuma powšykneje a pśirownujuceje literarneje wědomnosći.