Z Chóśebuza/Cottbus. Lětosa jo se wudaniło wšym, kenž su doma, w šuli abo na uniwersiśe pórědnje serbski nawuknuli: Moderacija (Sophie Meserojc, Ana Cachariasojc) jawišćowego programa 36. dolnoserbskeje Schadowanki sobotu tyźeń w kafeteriji Dolnoserbskego gymnaziuma jo se wótměła w dolnoserbskej rěcy, to groni mimo togo až su se wóspjetowali wše sady hyšći raz w nimskej rěcy kaž w zachadnych lětach. Lěc jo to był wuslědk z ewaluacije wucby dolnoserbšćiny lěta 2015? Tam ga běšo jaden wuknik měnił, až njemusy serbski wuměś, pśeto wucabnica tak a tak wšykno nimski wóspjetujo. Z ewaluacije jo se tež w kabaretnem pśinosku studańcow Sorabije Lipsk citěrowało. Wóno njejo se rowno z pointami mjerwiło, ale styrjo aktery (Maja Šramojc, Šarlota Kušcyc, Simon Blum a Maks Bagańc) su derje grali. Su pśedstajili njebjaske zmakanje styrjoch wuznamnych dolnoserbskich procowarjow – Pawliny Krawcoweje, Miny Witkojc, Mata Kósyka a Fryca Rochy – a jich starosćenje wó pśichod našeje rěcy.