Z Chóśebuza/Cottbus. To jo prědny serbski projekt tak pomjenjoneje „strukturneje změny“: Gódnosć serbskego imaterielnego kulturnego derbstwa znatu cyniś a pówušyś a z tym stwóriś nowe a trajne móžnosći za jogo wužywanje, teke komercielne. Za tym pitśku suchym a njelepym wopisanim chowa se wjelebocny projekt, na kótaremž su wobźělone dolnołužyska Domowina, Serbski institut a Domowniski muzej w Dešnje. Za njen su wóni dostali 1.500.000 euro na dwě lěśe wót Nimskego zwězka (Bund), z „gjarnca za malsne statki“, ako słuže tej wuwołanej strukturnej změnje.

Pónjeźele jo sobuźěłaśeŕ Domowiny Frank Kósyk projekt w Serbskem domje pśedstajił. Domowina jo ekstra za njen załožyła jadnu GmbH, dokulaž taka forma „z wobgranicowanym rukowanim“ woplěwa jich pśed njasenim financnego rizika – což pśi takej sumje jo rozymne cynjenje.