Jaden rucnikaŕ, ako źěła głownje z drjewom, chto to jo? To jo blidaŕ abo tyšaŕ, budu luźe za wětšy źěl groniś. A druge zasej budu měnjece, až jo to kołoźej (Stellmacher) abo teke twaŕc (Zimmermann). Wšykno jo pšawje, ale za togo cłowjeka, wó kótaremž dej byś how to grono, to wšykno njepłaśi abo jano zdźěla, tšošku. Wón drje wšake napórajo, zgótujo z drjewa – ale to njejsu blida, wokna, stoły, kólasa, spižki a druge. Ně, to su głownje kśice za kjarchoby a wšake cerkwinske, kśesćijańske figury a eksponaty. Wón ze swójima šykownyma rukoma a palcami wjele rědnego dres-lujo (drechseln) a wutšugajo, wurězbnijo (schnitzen). Na wopismje ako rucnikaŕski mejstaŕ stoj, až jo wón 1986 wuspěšnje zakóńcył wukubłanje ako „Drechsler“.