W rěźe „Heimat Domownja Domizna“ su glědali tenraz na filmowem festiwalu na šyršu tematiku. Njejsu jano pokazali starše a nowe filmy ze serbskego kulturnego žywjenja, ale teke take, ako pśedstajiju druge narodne a etniske mjeńšyny abo dalšne temy, ako su w nimsko-serbskej Łužycy wjelgin aktualne.

Z dwěma takima filmoma su pśišli tenraz filmarje ze Šwicaŕskeje do Chóśebuzu. Jaden – „Amur Senza Fin“ jo była komedija w retoromańskej rěcy a docełego prědny retoromański profesionalny telewizijny film w Šwicaŕskej (2018). A we tom drugem jo było połtera góźinu dłujko to grono wó wjelkach. „Die Rückkehr der Wölfe“ jo se jomu groniło a jen jo 2019 Thomas Horat zgótował, ako jo był sam pódla pśi premjerje filma w Chóśebuzu a na pšašanja a pśispomnjeśa z publikuma wótegranjał. Wušej 200 luźi jo film pśiwabił do „Gladhousa“ – interesa jo była wjelgin wjelika. Žeden źiw, pśeto južo wjele lět dłujko ga se wjerśi bejnje wótša diskusija wokoło wjelkow we Łužycy.