Jo-li móžno, nawjerśeś profesionelny grajny film we małkej rěcy, a móžo taki film pšawy hit wordowaś a se derje pśedawaś? Jo! To jo wucba z komedije „Amur senza fin“ (= Lubosć mimo kóńca) we retoromańskej rěcy. Na Chóśebuskem filmowem festiwalu jo wón wordował pokazany we sekciji Domownja. Pó filmje jo se pśizamknuło rozgrono z režiserom Christoph Schaubom, moderěrowane wót Grit Lemkoweje, kuratorki sekcije.

Jano 40.000 luźi powěda retoromańsku rěc we regionje Graubünden we Šwicaŕskej. Až taki film jo we jich rěcy nastał, jo nejpjerwjej cysto politiske rozsuźenje – jo wulicował režiser. Retoromańska rěc jo wordowała pśipóznata ako stwórta oficielna rěc šwicaŕskego statu, a šwicaŕska telewizija ako zjawna institucija jo nałožyła wjele pjenjez, aby ten film producěrowała. Howacej maju Retoromany 20 minutow telewizijnego programa kuždy źeń we swójej rěcy, wušej togo radijo a casniki.