Hyšći jo pitśku casa až do EUROPEADY, do europskich mejstaŕstwow narodnych a etniskich mjeńšynow w balokopanju, ako budu znowa w juniju w Korutańskej (Kärnten) w Awstriskej. Slědny tyźeń pětk wjacor pak su w gósćeńcu „Serbski dwór“ w Dešnje južo tšošku wót togo dožywili a sobu krydnuli, co se wšykno stanjo na takem wjelikem mjazynarodnem sportowem swěźenju. Howko ga běšo towaristwo „Serbske koparje/Wendische Auswahl“ pśepšosyło młodych muskich a młode žeńske, ako budu pśisłušaś tyma dwěma mustwoma, kótarejž buźotej na tej EUROPEAŹE 2020 zastupowaś Serbow a Domowinu. Pśisamem 40 balokopaŕkow a balokoparjow a jich trenarje a dalšne zagronite za wobej mustwje su pśichwatali do Dešna. To wósebne a wažne pśi tom było jo to, až su pśišli z Dolneje a Górneje Łužyce, a te ga budu pón teke gromaźe graś w jadnom mustwje. Nježli pak kśě gromaźe graś, muse se derje znaś, jaden togo drugego. Togodla jo było to zmakanje w Dešnje głownje myslone za to, aby se sportaŕki a sportarje z něntejšneju mustwowu „Serbske koparje“ a „Serbska wubranka“ bližej zeznali.