Z Budyšyna / Bautzen. Źinsa (stwórtk) dopołudnja jo planowana demonstracija zastupnikow łužyskich komunow w Barlinju pśed Kanclaŕskim amtom. Tu samu organizěrujo jich zwěstk Łužyska runda (Lausitzrunde). Až wóni su rowno ten źeń sebje wuzwólili, njejo se stało ze pśigódu. Rozmjej: Rowno źinsa buźo w nimskem parlamentu druge lazowanje kazni k mócowanju strukturow we brunicowych stronach (Strukturstärkungsgesetz). Demonstranty póžedaju, až nimske kněžaŕstwo dej pśi wustawjenju teje kazni lěpjej na pó­trjebnosći Łužyce glědaś.

Pśedsedaŕ Domowiny Dawid Statnik nagranja něnto oficielnje teke serbskich luźi, aby se na tej demonstraciji wobźělili. „Tak ako šołśi łužyskich komunow, tak teke my Serby wu­znajomy, až kněžaŕstwo njejo naše póžedanja do prědnego nacerjenja (how: Entwurf) teje kazni pśiwzeło. Dla togo jo wažne, až pokažomy, až z teju kaznju se definěruju wobstojnosći za pśiduce lětźasetki. A njebuźo-li se staś, až naše interese se do teje kazni zapišu, ga buźo pótom śěžko, Łužycu ako žywjenja gódny dwójorěcny region zeźaržaś“.