Z Hochoze/Drachhausen. Karlina Lotrina (roźona Kubic), nejstarša wobydlaŕka Majberka, jo we Złośanem plonje swěśiła srjodu tyźeń 100. narodny źeń. Na gósćinu wótpołdnja jo pśišło wjele gósći, a pśisamem z kuždego domu na Majberku jo něcht pódla był – jo nam groniła šwigerźowka Regina Lotrina z Hochoze. „My smy našej starce pódarili gójecu žałbu a strowy sirup Doppelherz, kótaryž wóna rada pijo. Wóna groni, až pśez njen jo tak stara wordowała“, jo šwigerźowka jubilaŕki Casnikoju groniła. Druge gósći su jej wjelgin wjele strusow pśinjasli. Wósebny gósć jo był faraŕ Wolfgang Gürtler z Kloštaŕskeje wósady, ku kótarejž Majberk słuša. Wón jo sobu pśiwjadł styrjoch tšubarjow, a wšykne su gromaźe wuspiwali tśi kjarliže, te tšubarje su tšubili na pozawnach. Faraŕ jo krotku namšu wótźaržał. To jo se tej 100lětnej wjelgin spódo­ba­ło, pśeto wóna ma póbóžnu wu­tšobu. Faraŕ Gürtler źaržy kužde lěto na stupnem stwórtku na Majberku pśi rěce namšu pód gołym njebjom, źož jubilaŕka jo pśecej pódla a pśiwdajo jomu, aby z jeje dwóru elektricu brał, ak jo za tu namšu trjebna.