Z Bórkow/Burg. Prědna źělba krajnych pjenjez k pódpěranju źiśownjow, źož se ze serbskeju rěcu źěła, jo wordowała wuźělona. Tu oficielnu wopowěsć (how: Bescheid) jo ministaŕka za kubłanje Britta Ernstowa srjodu tyźeń we Wjažy za źiśi a wuknjenje Lipa pśepowdała do rukowu landrota wokrejsa Sprjewja-Nysa Haralda Altekrügera. Ta wupłaśona źělba wunjaso 210.780 euro za šesć źiśownjow wokrejsa SPN, za lěto 2019 a 2020. Nagromadu su 400.000 euro na lěto we krajnej móšynje zaplanowane, a wóni se dostanu teke dalšnym źiśownjam: w měsće a we wokrejsu Górne Błota‒Łužyca a Damna‒Błota.