300 banjow jo pyšniło najs

Awtor: Madeleine Neubertojc stwórtk, 07. nowember 2019
„Tšašne“ banje w Běłej Górje na banjowem swěźenju. Foto: Madeleine Neubertojc

Z Běłeje Góry/Byhleguhre. Pśedslědny pětk jo sajźiło tudy fantastiski swěźeń! Na kuždem rogu drogi su wuźerali grozne (ale rědne) duchy na mimoducych. Źiśi su z lataŕnjami we ruce śěgnuli pó jsy a se źiwowali tym pyšnym banjam. Wušej togo jo sajźiło pjacone jěšnice a banjowu zupu. A gercy su tšubili.

Južo dwa dnja pjerwjej su pomogarje pilnje banje tšugali. Sobu gótowaś jo směł kuždy.

Janina Neubertojc, wuknica w Chóśebuzu, jo měniła: „ To jo rědnje, až sy mógał hyšći wótpołdnja na to tšuganje pśiś. Ja ga mam dopołdnja šulu. Mě jo se spódobało, až kuždy móžo how swóju banju indiwidualnje wugótowaś, mimo žednych wustajenjow“.

Swěźeń jo organizěrowało wejsne towaristwo we něgajšnem konsumje na jsy. Pśeśěg z latarnjami jo se zachopił tudy pěśich wjacor. Sprědku su šli gercy „Drachencombo“ z Hochoze, wognjowa wobora jo glědała, aby se nic njestało.

Smugi swětałkow a swěśece banje su pyšnili najs, wjacor jo był śopły a wjasoły.

Kerstin Zropfojc jo měniła „Ja se wjaselim kužde lěto na banjowy swěźeń. How jo pśecej wjelicka atmosfera a wšykno jo super zorganizěrowane“.

artikel pógódnośiś
(0 )
Pšosym zalogujśo se, cośo-li komentar dodaś
 

Pśiźo k Wam do domu z postom
abo roznosowaŕ Wam jen pśinjaso

  • nejnowše powěsći wót serbskego žywjenja
  • tšojenja, reportaže, portreje, měnjenja
  • ze serbskich jsow a z města

Nowy Casnik skazaś


połny pśistup za Nowy Casnik online a za e-paper

  • cełe wudaśe k lazowanju online
  • archiw slědnych wudaśow
  • fotografije woglědaś, artikele komentěrowaś

Nowy Casnik online skazaś