Wó Běłorusojskej jo we łužyskich a nimskich medijach jano mało k cytanjeju, k słyšanjeju a k wiźenjeju. To pak njegroni, až njewobstoje mjazy toś tym krajom a Nimskeju žedne zwiski, žedne kontakty, žedno zgromadne źěło. Take jo, ale za wětšy źěl we śichem, za kulisami wjelikego swěta.
Jaden, ako se sobu za to stara, jo Serb a Domowinaŕ – ga Frank Kosyk z Kopańcow/Neuhausen, ako źěła pśi Domowinje w Chóśebuzu ako kulturny manager. Wón ma hyšći dalšny wažny amt, a to mjazynarodny, diplomatiski. Južo z lěta 2008 ga jo wón Konsul za republiku Belarus, honorarowy, cesnoamtski. Wjele lět jo ako taki źěłał za Bramborsku a Saksku. Źinsa jano hyšći za Bramborsku, dokulaž su jogo nadawki bejnje pśibrali.