Z Chóśebuza/Cottbus. Wałtoru tyźeń jo wobradowało župne pśedsedaŕstwo dolnołužyskeje Domowiny. Cłonki pśedsedaŕstwa su za powěsću regionalneje powědaŕki Karin Tšukoweje kśěli wěźeś, kak spěchujo to pśetwarjowanje Serbskego muzeja. Na pósejźenju su se wobźělili zastupniki muzeja: wjednik měsćańskich zběrkow Steffen Krestin a kuratorce Serbskego muzeja Christina Kliemowa a Martina Nowakowa. Teke wjednik wótźělenja za kulturu pśi měsćańskem zastojnstwje Bernd Warchold jo był pódla (Serbski muzej ga jo we nosaŕstwje města). Wóni su pśinjasli Domowinarjam tu powěsć, až źěłaju wobstawnje a až muzej buźo se znowa we prědnej połojcy nowego lěta wótcyniś. Konkretny datum njejo wustawjony, dla togo až wšaka njewěstosć hyšći wobstoj. K eksemplu njejo ceło wěste, ga namakaju rucnikarja za witriny za serbsku drastwu a ga buźo wón móc swójo źěło docyniś ‒ jo nam groniła Martina Nowakowa.