3. oktobra jo se na wšaki part swěśił źeń nimskeje jadnoty. Pak teke w serbskem žywjenju smy ten samy źeń taku jadnotu dožywili. Ga něco, což jo pokazało a teke skšuśiło jadnotu, zgromadnosć Serbow w Dolnej a Górnej Łužycy. W znatej serbskej jsy Njebelčicy/Nebelschütz blisko Kamjeńca ga su se prědny raz zmakali balokoparje z Górneje a Dolneje Łužyce na zgromadny trening za EUROPEADU 2020, za europske mejstaŕstwa narodnych a etniskich mjeńšynow z młogich krajow w balokopanju. Te se wótměju znowa kóńc junija w Korutańskej/Kärnten w Awstriskej. Tam ga buźotej se teke wobźěliś dwě serbskej mustwje – jadno žeńskece a jadno muskece, a to docełego prědny raz gromaźe z młodymi sportaŕkami a sportarjami z Dolneje a Górneje Łužyce.