Pśiducu sobotu dostanjo se něgajšnej wjednicy Šule za dolnoserbsku rěc a kulturu Mariji Elikowskej-Winklerowej wjelike pócesćenje: Myto Ćišinskego. Kuratorium togo myta jo to wobwěsćiło tak: „Ta dolnoserbska ceptaŕka a žurnalistka z pólskimi kórjenjami dostanjo to wusoke pócesćenje za swójo dłujkolětne a njezmucne statki pśi zeźaržanju a dalejdawanju dolnoserbskeje rěcy we wšyknych generacijach, kaž teke za pódpěru statkownych projektow na pólu serbskeje kultury w Dolnej Łužycy.

„Ja se wjaselim, až źěło z dorosćonymi se tak pśipóznajo. To pokažo luźam w Dolnej Łužycy, až rěc jo gódna, a to mócujo a skoboźi luźi, kótarež serbske powědaju“, jo lawreatka groniła we rozgronje z Casnikom. Ceły interview buźomy wótśišćaś za tyźeń.