Z Chóśebuza/Cottbus. Wuběrk za wuzwólowanje Serbskeje rady jo wózjawił statistiku lětosnego serbskego wu­zwólowaŕskego zapisa. Za jich powěsću jo lětosa 911 wobydlarjow Bramborskeje póžedało, aby jich zapisali do zapisa serbskich wuzwólowarjow. Pśed styrimi lětami su to byli wěcej ako 1.600 (glej teke powěsć na 1. boce).

651 wuzwólowarjow jo se naslědku se na wuzwólowanju wobźěliło (to groni: jo z listom zgłosowało). Pśed styrimi lětami su to byli 1279.

Wuběrk jo lětosa wědobnje wustawił termin wuzwólowanja Serbskeje rady tak, aby był krotko pó konstituěrowanju nowego bramborskego parlamenta. Lěśojske ferije pak su wabjeńske akcije za wšym zdaśim wobśěžyli – suźi wuběrk. Wušej togo njejo lětosne wu­zwólowanje w medijach taki wótgłos měło kaž 2015. Nejskerjej jo to tencas ceło nowa wěc była, a teke wuzwólowański wuběrk jo tencas wěcej razow se zmakał a zjawnostne źěło gótował – stoj we powěźence wuběrka. Za to pak jo krajny sejm lětosa luźi mócnjej k wuzwólowanju Serbskeje rady wabił.