Strjažow/Striesow. Wjednica rěcneje šule jo kśěła pokazaś, co te wejsne žeńske wšykno wuměju a wugbaju. Kake talenty maju a kak wažne wóni su. Dla togo jo Marja Elikowska-Winklerowa z nimi powědała a te wulicowanka nagrawała. Z togo su nastali knigły „Zywjeńske dopomnjeńki serbskich žeńskich“. We nich su te wulicowańka wšykne napisane a pśidatnje na dwěma cejdejkoma nagrawane.

Toś te knigły prezentěrujo kněni Winklerowa tuchylu we našom regionje. Srjodu, 10. februara, jo było w strjažojskej starej šuli.

Jadna wót tych „wažnych wósobow“ togo dnja jo była Erna Hoffmannowa ze Strjažowa. Naroźiła jo se 1943 ako Panwicojc w Dešnje. We knigłach wulicujo wót jatšownego spiwanja, wót zapusta a wót źěła na burskem.

Ale to wótpołdnjo w strjažojskej šuli jo teke wšyknym wulicowała, kak jo se wopóznała ze swójim muskim. Na rejach. Až wóna jo sobu dostała, až wón něco wót njeje co, ale wóna nejpjerwjej njejo kśěła. Dla togo burskego dwóra, wóna ga jo to burske źěło derje znała a jo něco drugego kśěła. Ale pón jo tšach krydnuła, až njebuźo žednogo drugego dostaś. To dalšne jo napisane we tych knigłach.