Ze Złego Komorowa/Senftenberg. Rüdiger Hoffmann a Anke Schwarzenbergowa pśisłušatej jadnej partaji, Lěwicy, ale což wobchadanje z wuglom nastupa, stojtej wónej „na napśeśiwnyma bokoma barikady*“, kaž samej gronitej. Wón jo słušał k wótšym kritikarjam wótbagrowanja Rogowa. Wóna, wót lěta 1978 źěłajuca w janšojskej jamje, jo „pó wótwaženju argumentow“ stupiła na bok górnikow a pilnowała wó zeźaržanje teje industrije, „teje jadneje, ako jo pó paźe DDR wóstała“.
We jeju štrejtaŕskem rozgronje na temu „Łužyca ‒ Kak dalej pó wuglu?“ jo se hyšći raz derje wopokazało to dwójenje, ako źo pśez cełu Łužycu. Na rozgrono jo kazała Załožba Rože Luxemburg. Casnikaŕka Ines Neumannojc jo jo moderěrowała.