Z Groźišća/Grötsch. Slědny stwórtk su Domowina, Bramborski krajny sejm a Załožba za serbski lud pšosyli tudy na Serbski wjacor. Pśewšo wjele luźi njejo do togo dostało wabjeński cedlik, jaden a drugi jo se tomu źiwał. Daś jo kaž co, na ten wjacor we Halkojc gósćeńcu jo jadnab 23 luźi pśišło (wótglědajucy wót kandidatow).

Głowny zaměr togo wjacora jo było, až luźe deje se wopóznaś z kandidatam, ako kśě bramborskich Serbow zastupowaś w Serbskej raźe našogo zwězkowego kraja. Z Drjenowa, Turjeja, Barbuka, Brjazyny, Šejnejdy a Bórkow su pśišli. Ako jo nam Halkojc Rudi wulicował (wón jo jano wjelgin daloki pśiswójźbny z kjarcmaŕku), jo to był informatiwny wjacoŕk. Nejžpjerwjej su kandidaty se pśedstajili, a pótom su luźe w lichej atmosferje pšašali a diskutěrowali. We srjejźi jo stojało to pšašanje, kak móžoš nejlěpjej zdźaržaś a woplěwaś serbsku rěc.

Dalšne temy ako su byli pśedwiźone za ten wjacor (pó dnjownem porěźe), njejsu se wěcej pśepowědali. Diskusija jo była do zeger 20:00, a dlej njedejało to zarědowanje traś.