Ze Slěpego/Schleife. Kak jo generacija našych starych starjejšych pśed 100 lětami swajźbu swěśiła? To se dajo derje wuznaś z noweje wustajeńce w Serbskem kulturnem centrumje, ak jo se wótwóriła pětk. Na njej prezentěrujo se 150 swajźbaŕskich fotografijow, kótarež wobydlarje su gromadu znosyli.

Ideja jo z lěta 2013: Domowinska kupka jo na pśiraźenje Wolfganga Kotisseka chopiła dokumentěrowaś serbsku swajźbu, ak jo se něga swěśiła w slěpjańskej wósaźe.

To jo se derje raźiło. Kotissek jo te zezběrane fotografije digitalizěrował a pśigótował k rozpokazowanju. Jaden źěł wót nich jo se prezentěrował južo 2017 na płachśe. Tencas su wobzamknuli, až budu pśigótowaś ekstra wustajeńcu.

Ta sama ma tśoch awtorow, to su Heidemarie Richtarjowa, Stephanie Bierholdtowa a Wolfgang Kotissek. Wóni su se źěkowali pśedewšym źiśam a tym źiśiźiśam tych wótmólowanych, až su byli zwólne, něco wót swójich dopomnjeśow zjawiś.