Ze Žylowa/Sielow. Jadnasćo rejtari jo njeźelu pódla było na kokośe blisko žylojskego sańkowaniša. Pódla jo teke było 14 źowćow a w serbskich drastwach. Pśewóźowali su je gercy wót „Błośańskich dujarjow“. Wumaršěrowali su dypkownje zeger 14:00 wót wognjoweje wobory. Wjele Žylojskich jo slědowało pśeśěgoju na swěźenišćo.
Rownocasnje su w Žylowje njeźelu měli „Trjekarjowy swěźeń“ (Schlepperfest), ako jo južo wjele lět dobra adresa za pśijaśele rolnikaŕskich wózydłow a zmakanišćo za fachowe rozgrona.
To jo była kulisa za gólcy na swójich kónjach, ako su zwětšego byli wupóžycone wót Jerolojc rejtowanišća a wót Wehlanojc dwóra za rejtarje w Běłej Górje.