Lube źiśi,

zasej som se woglědała źiśownju. We Hochozy som była. Pójźćo ga sobu!

Tej źiśowni se groni „Regenbogen“ (tyca). How chójźi 32 hochoskich źiśi, w horśe jo jich 25. Na 60 źowćow a gólcow by mógało pśiś.

W źiśowni jo jadna Witaj-kupka. We tej kupce jo 9 źiśi. Cesćej se pak stanjo, až ta kupka se měša z drugimi źiśimi. To ma pón organizatoriske pśicyny. Wuslědki su wšake. Na jaden part jo derje, až teke źiśi z drugich kupkow krydnu serbske słowa kradu sobu. Na drugem boku pak musy źiśownica pśecej zasej pla „0“ zachopiś a wšakim źiśam wšo znowa rozkłasć.

W kupce by městno było za 10 źiśi. Ale lětosa buźo 5 jich do šule pśiś. Pór drugich małych źiśi pśiźo za to. Ale wurownaś njebudu tu licbu: zajm za Witaj-kupku by mógał wětšy byś. To jo nam groniła wjednica źiśownje Resi Lotrina. Kak by mógali to pólěpšyś? Wóna měni, až wěcej młodych luźi dejało śěgnuś do Hochoze. Gaž familije ze źiśimi how śěgnu, ga su te źiśi južo něźi w drugej źiśowni. Wóttam njocoju pšec. Zawěsće by teke źiśi ze susednych jsow witane byli. We serbskej jsy Drjenowje na pśikład ga njewužywaju serbsku rěc w źiśowni.