Žylow/Sielow. Hyšći tyźeń pjerwjej, ako 40 žylojskich lubowari karnawala jo śěgnuło sobu we tom wjelikem „śěgu wjasołych luźi“ w měsće, jo swěśiło słyńcko a kuždy jo se myslił: nalěto se póra! Ale něnto, ako žylojska młoźina jo swěśiła zapust njeźelu tyźeń, jo to wjedro se hyšći raz pśewobrośiło. Wóno jo było šere, zymne a mokše. Źowća su musali sebje změstymi foliju pśez dešć wobchyśiś. Až te njegódne wobstojnosći njejsu młoźinje wjasołosć skazyli, jo było ned na prědne póglědnjenje wiźeś. Snaź lažy to na tom, až zapustarje se južo wjasele na jubilejny, wjelicki zapust za lěto: ten 160. zapust! Togodla su spiwajucy a rejujucy južo něnto probowali a na probu wjasołe byli.