Stephan Kaiser, lětnik 1957, njejo roźony wót doma Serb. Weto pak jo z tym serbskim wjelgin wusko zwězany. Njejo jano wuchójźował Serbsku rozšyrjonu wušu šulu „Marjana Domaškojc“ w Chóśebuzu, ale jo wóstał teke ako wuměłc tomu serbskemu na wšaki part zwěrny. W lětach 1980 do 1995 jo wón był nejpjerwjej cłonk Koła serbskich twórjecych wuměłcow (bildender Künstler) a pózdźej cłonk Zwězka serbskich wuměłcow. Wuknuł běšo na gjarncarja, a na tom pólu jo se wón dalejkubłał a kwalificěrował, w źěłarni (Werkstatt) za keramiku na tencasnej Inženjerskej wusokej šuli w Chóśebuzu a pón ako student na Wusokej šuli za twórjece wuměłstwo w Drježdźanach. Z lěta 1993 jo pśi-stajony na Bramborskej techniskej uniwersiśe, a nawjedujo tam źěłarnju „Plastisches Gestalten“. W njej mógu se studentki a studenty we wólnem casu zaběraś z wuměłskim źěłom, a to kužde lěto młoge wužywaju, teke te z drugich krajow.