Z Pódstupima/Potsdam. Bramborski kabinet jo slědny tyźeń jadnomyslnje witał plany ministaŕki za wobchad Kathrin Schneider. Wóna co zeleznicowu ceru mjazy Lubnjowom a Chóśebuzom dwójokólejaty wutwariś. Druge kóleje su byli dłujkolětne pominanje eksternych fachnikow. Zeleznica pak jo samo druge kóleje we tom wótrězku wótryła.

Statna kanclaja pišo, až Bramborska jo wjele lět dłujko dwójokólejaty wutwaŕ pominała, ale w zwězkowem ministaŕstwje za wobchad njejo se nic gibało, su pisali. Dlatog jo Bramborska łoni sama dała wšo planowaś. Pśisamem 11 milionow su za to wudali. Pśez strukturnu změnu źo něnto wšykno wjelgin malsnje. Pó něntejšnych planach kśě nowe kóleje w lěśe 2027 chopiś wužywaś. Zwězk co za tu 29 km dłujku ceru 156 milionow wudaś.

Su citěrowali ministaŕskego prezidenta Woidkego, kótaryž jo měnił, až jo to było śěžke wójowanje a až dej něnto malsnje doprědka hyś. Jo formulěrował ako zaměr 30minutowy takt wót Chóśebuza do Barlinja z 160 km/h.