Rowne/Rohne. Tudy su zachadny kóńc tyźenja ned swěśili dwa jubileja: Towaristwo Njepilic dwóra jo wórdowało 20 lět, Šalmajowa kapała 55 lět. Zgromadny swěźeń jo był jasna wěc, wšak jo kapała wót zachopjeńka pódpěrowała Njepilic towaristwo. Wobej towaristwje stej woblubowanej we jsy a matej wjele pilnych pomagarjow, ako su gronili na jubilejnem swěźenju. Pśišli su mjazy drugimi slěpjański šołta Reinhard Bork, wejsny prědkstojaŕ Matthias Jańš, stary šołta Hanzo Haša a dalšne gósći. Slěpjańskej šuli, Witaj-źiśownja we jsy, LEAG, wognjowa wobora su pósłali gratulanty, a teke ze susednych jsow su pśišli. Manfred Nickel, pśedsedaŕ Njepilic towaristwa, jo źaržał swěźeńske dogrono a jo wulicował wót stawiznow dwóra a zachopjeńka towaristwa. Źaseśo cłonki su tencas měli. Do lěta 2006 jo był głowny nadawk towaristwa, dwór rekonstruěrowaś. W slědnych 20 lětach su how pisali domowniske stawizny. Kóńc septembra buźo 20. dwórny swěźeń na Njepilic dwórje. Na slědnych 19 swěźenjow su pśecej byli serbske tradicije we srjejźi, pó motu „Kak to jo było“.