„Barwy Europy 2019“ – k nim słuša teke serbska drastwa ze swójimi kšasnymi barwami. To su nazgónili wobźělniki plenaira mólarjow w Grěšnje (Grießen, słuša k Janšojcam). Tam su jadnasćo dnjow dłujko źěłali. Na kóńcu su se luźe mógali wuslědki woglědaś w tamnem familijowem centrumje na terenje něgajšnej gólnicy.
Šesty raz jo se zmakało 20 wuměłcow z wokrejsa Sprjewja-Nysa a ze Zieloneje Góry (w Pólskej) na zgromadne mólowanje. To jo pśecej raz w Zielonej Górje, raz we wokrejsu Sprjewja-Nysa, a to wót lěta 2011 sem. Pódla su byli „stare wuchace“, ako Annette Lehmann-Westphalowa z Města, Izabela Sak a Agnieszka Kujawa-Bartuszek ze Zieloneje Góry, ako se kužde lěto wobźěliju.