Stary rowowy kamjeń ze serbskim napismom, ako stoj zasej na barbuckem kjarchobje. Gaby Wilfried Halbaš za nim intensiwnje njepytał, ga njeby wón nejskerjej žednje wěcej wordował namakany. Wilfried Halbaš jo napisał barbucku chroniku. To jo płod jogo 20 lět dłujkego zběraŕskego a slěźaŕskego źěła. Wóna jo se wudała z pjenjezymi Gatojskeje załožby, kótaraž šćodrje pódpěra kulturne projekty w gmejnje.

Wilfried Halbaš jo w Barbuce/Bärenbrück a cełej gatojskej gmejnje znata paršona. Wón jo zestajał a napisał chroniku swójeje narodneje jsy Barbuk. To jo ten nejwěcej widobny płod jogo pśisamem 20 lět dłujkego zběraŕskego a slěźaŕskego źěła: chytśe wugótowane, 328 bokow tłuste knigły (wóni su se śišćali 2013, we rědu wejsnych chronikow gatojskeje gmejny). Zachadny pětk jo ten awtor swěśił swój 60. narodny źeń, a Nowy Casnik jo pśi tej góźbje k njomu woglědał.