Za 61lětnego policista na wuměń-ku Alfonsa Schulza jo mólowanje jajow wjele wěcej ako jano hobby. Wón jo se ekstra natwarił někotare mašiny, kótarež jomu pomogaju z kokošynych a gusynych jajow pšawe kumštarske źěła napóraś. Wón jo we swójej baslarskej śpě doma instalěrował wósebnu wjertawu, kótaraž cyni jomu to pśeštapowanje wudutych jajow wjele lažčejše. Wušej togo ma wón tam mašinu k frezowanju jajow, mašinu k wuduwanju jajow a teke blatawu, na kótarejž wogrěwa šklicki z wóskom a barwami. To su jogo genialne wunamakanja. „Te šklicki za barwy gótuju ja z flašow ze zelowym paleńcom Moorgeist. Wóni su hejnak za to stwórjone. Ja pyšnim jaja nejlubjej z wóskom, a nałožuju batikowu a bosěrowańsku techniku. Ale ja se wopytuju teke we frezowanju. Ja pśi tom wótpócywam a se naslědku wjaselim, gaž móje małke wuměłske wuźěła su gótowe.