Z Drježdźan/Dresden. Zastupniki Serbskego sejma, Łužyskeje aliance, Zelenych a Lěwice su gromaźe z wobswětowymi organizacijami a někotarymi wobydlarjami Miłoraza gromaźe pódpisali póžedanje, až wjas Miłoraz njedej se dla brunice wóttergaś. To jo se stało na zgromadnej casnikaŕskej konferency pśedslědny stwórtk.
„Notnosć producěrowanja elektrice z wugla wóteběra rapidnje, dokulaž klima se rozgrěwa a kněžaŕstwo jo wobzamknuło, až budu wót wugla wótstupiś. Wažnosć regeneratiwneje energije pśiběra“, pišu wóni we zgromadnej papjerje. Wušej togo měnje, až ta pśizwólowańska procedura k dobywanju wugla pód Miłorazom njejo zewšym zachopjona,.
Z togo wšyknogo wóni wuznaju, až wótbagrowanje Miłoraza njejo daniž trjebne daniž njedajo se z mócu pśesajźiś. A pśipowěźiju mócne woboranje: „My buźomy póžywaś wšykne juristiske móžnosći ‒ we priwatnem, zjawnem a mjazynarodnem pšawje ‒ aby skóńcowanje Miłoraza a dalšnych wobgrozonych jsow wótwoborali“.