Pód motom „Fridays for future“ štrajkuju wukniki a demonstrěruju na pětkach za klimu. Zachopiła jo Greta Thunberg w Šwedojskej, jeje aktiwity su młogim w Europje byli pśikład. W decemberje 2018 jo to w Nimskej zachopiło. Zachadny pětk jo był tśeśi raz taka demonstracija za dobru klimu w Chóśebuzu. Jadnab 250 luźi jo se zgromaźiło prědk Lutheroweju cerkwju. Ako wšuźi su se wuknikam pśizamknuli starjejše, študańce a druge dorosćone.

Pódpěrowali su je wukniki z Barlinja, ak su we ferijach na pětkach ducy w Bramborskej. Wjele tych chóśebuskich wuknikow chójźi na Steenbeckowy gymnasium. Cogodla jo jich šula taka prezentna? „Naša šula ma pśirodnowědny raz. Snaź togodla wěcej pśemyslijomy wó klimje. A za wšym zdaśim maju wósebnje gymnasiasty starjejše, ako reflektěruju staw swěta. Gaž jaden wuknik w rědowni pón zachopijo, ga śěgnjo druge sobu“, jo groniła jadna demonstrantka.