Dr. Peter Kroh, syn źowki serbskego politikarja a žurnalista we Weimarskem casu Jana Skale, jo pśed krotkim wudał knigły z titelom Minderheitenrecht ist Menschenrecht. Sorbische Denkanstöße zur politischen Kultur in Deutschland und Europa. Alfons Wićaz jo se z nim rozgranjał.

Nowy Casnik: Wy se južo wjele lět zaběraśo z mjeńšynoweju politiku a statkami Wašogo serbskego starego nana Jana Skale. Něnto sćo wudali knigły. Cogodla jo ta tema za Was wažna?

Peter Kroh: Wšuźi w Europje su mjeńšyny wordowali a worduju hyšći źinsa diskriminěrowane. Se wě, až nic wšuźi jadnak mócnje. Ale: Zgromadne žywjenje etnijow jo lěbda mimo konfliktow, teke tam, źož pšawa mjeńšynow su w kaznjach wustawjone.

Pódtitel knigłow zni: Sorbische Denkanstöße zur politischen Kultur in Deutschland und Europa. Wujźo z politiskeje situacije Serbow mjazy 1920 a 1945 telik mysleńskich impulsow za mjeń-šynowu politiku we źinsajšnem casu?