Slěpjańska wósada ze swójimi wjaskami, rědnymi stronami a teke ze swójimi problemami – wóni su zwěrnym cytarjam Nowego Casnika derje znate.
Ale we tej wokolinje dajo wěcej zajmnych jsow, teke serbskich. Jadna wót nich jo Nowe Město/Neustadt. Ze Slěpego/Schleife musyś pśecej do krotkego wjacora, gaž do Nowego Města coš. Pśez Rowne/Rohne, Mułkoce/Mulkwitz, pón pśiźo krajina, kótaraž jo pregowana pśez brunicowu industriju, źěłaŕnje a gótnice. Na pśikład ma Reinert-spedicija z Mułkoc swóju centralu tam srjejź góle. Wóttam pśecej dalej pó droze pśiźo Nowe Město.
Pśez tu wjas běžy Sprjewja. Ta wjelika rěka sobu wugótujo charakter jeje jsy. Teke Struga běžy w bliskosći jsy a na pódwjacor wót Nowego Města běžytej ta mała Struga a wjelika Sprjewja gromadu.
Pśi brjoze Sprjewje smy se namakali z Karstenom Nyčom (Nitsch). Wón sam wót sebje groni, až jo ten „Sprjewiny fotograf“. Pód tym mjenim jo wón cesto ducy, wótmólujo zwěrjeta, rostliny a krajiny. Gótujo to w nadawku drugich a teke zagóritosći dla. Až do Šwedskeje jo na taki part ducy.
Swójski rukopis jo jomu wažny