Z Chóśebuza/Cottbus. „Smy spontanje na to pśišli“, groni Casnikoju pśedsedaŕ towaristwa Studnja z. t. „Pla Italianarja dostanjoš serwietki z italskimi motiwami a grichiska restawracija bitujo swójim gósćam serwietki z pśiměrjonym motiwom“. Za Halloween, balokopanje a wšykno dajo serwietki, jano nic za serbski swěźeń. Tam kupijoš pśecej jadnobarwne serwietki a kombiněrujoš běłe, cerwjene a módre“, jo měnił pśedsedaŕ Studnje Robert Engel.

Ale to buźo se něnto změniś. Towaristwo jo w zagromadnem projekśe ze Załožbu za serbski lud producěrowało „serbske serwietki“. Měnjone su serwětki, źož su serbske barwy, serbska rěc a serbske motiwy kombiněrowane. Jich dajo tuchylu dogromadu w šesć wšakich wariantach. Tśi motiwy eksistěruju a kuždy dajo ako w dolnoserbskej tak teke w górnoserbskej rěcy.

Za wósebne swěźenje abo ako wabidło za institucije mógu wósebne małe edicije śišćaś, kótarež se rozeznawaju wót drugich. Pśez to, až jo logo institucije abo swěźenja integrěrowany. To su južo gótowali za muzej Dešno, glědajśo na foto.