1. wobraz: Tak wuglěda młoda ambrozija – pitśku hejnak somotk (Studentenblume) 2. wobraz: Winfried Böhmer z Wětošowa jo pokazał pśed dwěma tyźenjoma južo wětšu rostlinu. Wuglěda pódobne bylicy (Beifuß). Ale ambrozija ma spódny bok łopjeńkow zeleny. Nic śery, ako bylica. 3. wobraz: Kwiśeca ambrozija na kšomje drogi slědne lěto srjejź septembra. Kwiśonkowe stołki (Blütenstände) wuglědaju ako wót škórodowy (Breitwegerich). Fota: I. Neumannojc (2), M. Hoffmann (1) 
My Serby licymy ako góspodliwy a cuzym wótwórjony lud. Na to smy z połnym pšawom gjarde. Ale pla rostlinow wugótujo nam jaden „gósć“ starosći.
Měnjona jo ambrozija. Ta rostlina jo wórdowała zawlacona (eingeschleppt) ze sewom. Prědny raz w 1970ych lětach smy ju pla nas wiźeli w kopicach. Z hungorskim sewom za słyńcu su prodrustwa, groni se, bźeze swójeje wóle teke ambroziju wuseli.
Pla nas rosćo ambrozija wósebnje derje
Ambrozija se pla nas derje cujo. Suchy, śopły klima a pěskojta zemja se jej derje spódobaju. Dolna Łužyca jo jadno śěžyšćo za rozšyrjenje ambrozije w Nimskej. Mjazy Baršćom a Kalawu rosćo wóna wótergi we wjelgin wusokich koncentracijach. Foto dołojcy dej byś za to dopokaź. To jo wótmólowane we Wětošowje, źož jo mimo Drjowka nejwuše rozšyrjenje ambrozije.
Jo kradu mócny wubuźak za alergiju
Ambrozija (nimski Beifußblättriges Traubenkraut a łatyński Ambrosia artemisiifolia), móžo wob lěto do 60.000 semuškow producěrowaś. Až do 40 lět dłujko mógu wóni klějaś (keimen).
